ಇಳೆಯ ಆರ್ತನಾದ
ಬಿರು ಬಿಸಿಲಿನ ಅಟ್ಟಹಾಸವೋ
ಬರಿದಾದ ಬಿರುಕು ಭೂಮಿಯೋ
ಯಾರ ಬಳಿಯಲಿ ಬಿಕ್ಕಳಿಸಲಿ
ಈ ಬೇಗುದಿಯ, ಬಾಯಾರಿದ ಸಂಕಟವ!
ಹಸಿರ ಬಸಿರ ತುಂಬದ ಹತಾಷೆಯ!
ನದಿಯ ನಾದವದು ಕೇಳದಾಗಿದೆ
ಹಾಹಾಕಾರದ ಆಕ್ರಂದವೇ
ಪ್ರತಿದ್ವನಿಸುತಿದೆ!
ಹಚ್ಚ ಹಸಿರ ಕಾನನವದು
ಕಾಣದಾಗಿದೆ
ಅಳಲ ತೋಡಿಕೊಳ್ಳುವ ಮಡಿಲದು
ಬರಿದಾಗಿದೆ
ಯಾರ ಬಳಿಯಲಿ ಬಿಕ್ಕಳಿಸಲಿ
ಬಾಯಾರಿದ ಸಂಕಟವ!
ಹಸಿರ ಬಸಿರ ತುಂಬದ ಹತಾಷೆಯ!
ಎಳೆ ಬಿಸಿಲ ಹಿತವು, ಕಲರವದ ಕಂಪು
ತುಂತುರು ಮಳೆಯ ತಂಪು
ಕಾಡುತಿಹುದು ಸ್ವಪ್ನದಂತೆ
ವಾಸ್ತವದ ಕೆಂಗಣ್ಣು
ನೋಡುತಿಹುದು
ಎನ್ನ ಬಾಯಾರಿದ ಸಂಕಟವ!
ಹಸಿರ ಬಸಿರ ತುಂಬದ ಹತಾಷೆಯ!
ಪ್ರಕೃತಿ ನಾನು ಏಕಾಂಗಿಯಾದೆ
ಜೀವದ ಕುರುಹೇ ಕಾಣದಾಗಿದೆ
ಕಾರ್ಮೋಡವದು ಓಡುತಿಹುದು
ಎನ್ನ ಏಕಾಂಗಿ ಮಾಡಿಹುದು
ಅರಿಯದೆ ನನ್ನೀ ಬಾಯಾರಿದ
ಸಂಕಟ!
ಹಸಿರ ಬಸಿರ ತುಂಬದ ಹತಾಷೆಯ!
- ಶರಧಿ